Maty tsy « tra-drano » ny tovovavy 18 taona raha nilomano tao amin’ny dobo filomanosana iray. Tsy fandraisana andraikitra ny mpikarakara no fantatra fa nahatonga ny loza. Tao amin’ny trano fisakafoanana « Le bateau ivre » ao Toamasina no nitrangan’izany loza izany ny tolakandron’ny alatsinainy teo. Tsy mahay milomano ity tovovavy ity ary no fiofanany amin’izany. « Mbola vao mianatra milomano izy ka raha vao nitsoraka dia tsy nivoaka intsony hany ka sempotra », araka ny fanazavana voaray hatrany.

Teo anatrehan’izany anefa dia nitazam-potsiny ny mpikarakara nanentana azy mbola ho tafarina avy ao ka izao niteraka famoizoina  aina izao.  Araka ny nambaran’ny loharanom-baovao voaray dia tsy vao sambany ny loza tahaka izao no nitranga tao amin’ity toeram-pisakafoanana ity. Efa fanindroany ity dobo filamanosana ity no nahafatesana olona. Zanaka mpanao politika ao Toamasina ity tovovavy maty ity araka ny fantatra hatrany. Milaza ny tsy hipetra-potsiny amin’izao manjo azy izao izy araka ny fanambaran’ny akaiky azy. Andrasana araka izany ny ho tohin’ny raharaha. Etsy ankilany kosa, misokatra ny fanadihadiana ataon’ny mpitandro ny filaminana.

Laurena Nany