Habibiana tsy roa aman-tany ary tena mampihoro-koditra raha ity vitan’ny tovolahy 18 taona ity. Ny alin’ny alarobia hifoha alakamisy teo no nitrangan’izany tao amin’ny kaominina Ankazomborona, distrikan’i Marovoay nandritra ny fora zaza.
Alina tokony tamin’ny 2ora tany ho any dia nomen’ilay renim-pianakaviana an’ilay tovolahy mba ho tazominy ilay zazavavikely herintaona sy efa-bolana monja. Nentiny niala ny olona maro be anefa ilay zazakely ka nanamparany ny filan-dratsiny. Nisy nahatratra izy teo am-panaovana izany ka saika iharan’ny fitsaram-bahoaka. Naiditra hopitaly avy hatrany kosa ilay zaza taorian’izay ary araka ny filazan’ny mpitsabo azy dia simba tanteraka ny fivaviany sy ny ao anatin’ity zazakely ity. Ilay tovolahy kosa efa am-pelatanan’ireo mpitandro filaminana mba atao famotorana.
Noho ny hafanam-pon’ny fianakaviana sy ny vahoaka dia nasintaka ao an-toerana ilay nahavanon-doza mandra-pahavitan’ny famotorana sy ny sazy mendrika azy, araka ny vaovao voaray avy any an-toerana.
Manoloana izany dia tokony ho mailo hatrany ny rehetra, indrindra ny manan-janaka vavy, mba tsy hatokitoky olona fahatany na dia olom-pantatra aza, fa ny fakam-panahy tsy maha hendry ary efa miha biby saina koa ny olona amin’izao fotoana izao. Tsy fahafinaretana intsony no ilainy fa fanaranam-po tsotra izao.

Laurena Nany