Ny marainan’ny 9 jolay no hita faty ny ramatoa iray 78 taona izay natao takalon’aina tamin’ny lalana mihazo an’i Miarinarivo iny. Ny alin’ny 8 jolay tokony tamin’ny 11ora no nisehoan’izany tao amin’ny fokontany Ambatofolaka, kaominina Soamahamanina, ao amin’ny distrikan’i Miarinarivo.
Avy any ivelany ilay ramatoa no notsenaina fiara marika « Peugeot 405 » teny Ivato ho any ambanivohitra Miarinarivo. Rehefa tonga tamin’ilay fokontany voalaza etsy ambony anefa dia nosakanan’ny fiara « Land Rover » mitonda olona enin-dahy ao anatiny. Nolazain’ny iray tamin’izy ireo tamin’ilay mpamily nitondra an’ilay ramatoa be fa simba ilay fiara mba entina hamitahana azy ireo. « Mitete be ny solika avy ao anaty fantsona », hoy ity jiolahy. Nijonana noho izany ilay fiara ary nidina ilay mpamily hijery ny simba raha toa ka nijanona nanaraka izay ihany koa ny fiaran’ireo olon-dratsy. Vao nivoaka anefa ilay mpamily dia nentin’ny iray tamin’ireo jiolahy ilay fiara niaraka tamin’ilay ramatoa ao anatiny.
Nampandre ny mpitandro filaminana ilay mpamily ary niroso tamin’ny fikarohana an’ilay ramatoa be avy hatrany izy ireo. Efa ny vatan-mangatsiakany anefa no hita ny marainan’io tsy lavitra ny toerana nakana azy an-keriny. Fantatra ihany koa fa lasan’ireo jiolahy daholo ny vola be sy ny entana. Misokatra ny fanadihadiana ataon’ny zandarimaria.

Laurena Nany