Tsy tana mihitsy ilay zanaky ny niharan-doza nidaroka mafy an’ilay nitondra bisikileta raha nandona ny reniny na dia efa niaiky ny fahadisoany aza. Saika ho tsindrominy antsy mihitsy ka voatery niditra an-tsehatra ireo polisy tao Mahajanga tamin’ny fanakanana azy.
Ny harivan’ny alakamisy 9 jolay tamin’ny 6ora sy sasany no fantatra fa voadonan’ny bisikileta tsy nisy jiro ny ramatoa iray raha hiampita lalana, teo akaikin’ny CSB Tanambao Sotema, amin’ny lalam-pirenena fahefatra iny.
Nandeha mafy ity bisikileta ity hany ka nipitika ho roa metatra niala teo amin’ny toerana nisy azy ilay renim-pianakaviana ary nitrosona teny afovoan’ny arabe. Ilay mpitondra bisikileta kosa nianjera teo amin’ny sisin-
dalana.
Soa ihany fa tsy nisy fiara nandalo fa raha tsy izany mety ho loza no nitranga araka ny fanambaran’ny loharanom-baovao. Vokatry ny hatairana sy ny fianjerany dia tsy nahatsiaro tena ilay ramatoa ka naiditra avy
hatrany tao amin’ny CSB akaiky teo.