Tsy ampy ny vesatra. Valalanina ny rehetra. Ao raha ! Nahazo fahafahana vonjy maika rehefa nandalo tao amin’ny fitsarana Toliara, afak’omaly, ny dahalo roa ikoizana amin’ny halatra omby any amin’ny distrikan’i Toliara II iny. Voasambotry ny zandary teny amoron’ny reniranon’ Onilahy (atsimon’ny tanànan’i Toliara) ny alakamisy 9 jolay lasa teo i Rebita rehefa nitsoaka ny mpitandro filaminana taorian’ny nangalarany omby 20 tao Anatsimavo.

Lehiben-dahalo ikoizana

Raha ny fanazavan’ny chef d’escadron Tsiketa Janvier Parfait, komandin’ny kaompanian’ny Zandarimariam-pirenena ao Toliara, nitafa tamin’ny mpanao gazety omaly, dia tratra tao amin’i Rebita monina ao amin’ny fokontany Marofatika, kaominina Maromiandra, ny omby dimy tamin’ireo 20 very. Ity Rebita ity, hoy hatrany ny komandà Tsiketa nanohy ny fanazavany dia rain’i  Fanampy, lehiben’ny dahalo malaza ao Maromiandra, antsoin’ny maro hoe : CB na Commandant de Brigade, izay mbola karohin’ny mpitandro filaminana amin’izao.

Eric Toliara