Tany Ambilo ao amin’ny kaominina Betsiaka, anatin’ny distikan’i Ambilobe no nisehoan’izany ny alakamisy lasa teo, tamin’ny 10 ora maraina. Ady fatana no niamtobohan’ny loza araka ny vaovao voaray avy any an-toerana.

Nisy ny ady hevitra teo amin’ny lehilahy 33 taona sy namany hafa tao an-toerana. Noho ny hevitra tsy mitovy anefa dia niafara tamin’ny fikasian-tanana sy ny fampiasana antsy izany. Naratra mafy vokatry ny vono sy fandratrana azy ilay lehilahy. Nahita ny rà nandriaka ilay ramatoa anabavin’ilay naratra dia namoy ny ainy.  Tapaka lalan-drà no nahafaty azy raha ny fizahana nataon’ny mpitsabo azy. Ilay naratra kosa nentina teny amin’ny hopitaly ao Ambilobe mba ho tsaboina. Efa mandeha ny fikarohana ireo tompon’antoka tamin’ny fandratrana izay niteraka fahafatesan’olona.

Tranga efa fahita

Efa tranga fahita sy fandre isan’andro ao Ambilo, ao amin’ny kaominina Betsiaka, ny ady fatana. Raha tsy miditra manao fiambenana ny mpitandro filaminana dia misy hatrany ny fifamonoana. Tsy maharaka anefa ny fiambenana ataon’izy ireo manoloana ny fatana an-jatony ao an-toerana izay miparitaka amin’ny sektera 20 mahery.

Manampy trotraka ihany koa ny gadra vao nivoaka ny fonja mampiasa ny sandriny any amin’ireo fatana ireo.

Tena mahazo vahana ny asa ratsy sy fifamonoana any an-toerana amin’izao fotoana izao nefa tsy ampy ny mpitandro filaminana miasa ao Betsiaka hoy ny loharanom-baovao.

Laurena Nany