Ady paraky no nahatonga ny fifamonoana. Renim-pianakaviana iray 40 taona no maty novonoim-badiny tany Andaingobe, ao amin’ny fokontany Andrifialava any amin’ny kaominina Betsiaka ao amin’ny distrikan’i Ambilobe, ny voalohan’ny herinandro lasa iny.

Daroka sy totohondry no nataon’ilay rangahy azy rehefa tsy nahatana ny hatezerana izy. Vokatry izany dia namoy ny ainy avy hatrany ilay ramatoa.

Tsy nitsoaka kosa ilay rangahy manoloana ny fahotana mahafaty vitany fa niandry ny fahatongavan’ny mpitandro filaminana mba hisambotra azy. Araka ny filazany dia tahotra ny iharan’ny fitsaram-bahoaka no tsy nandosirany.

Efa an-taonany maro izy no niara-nipetraka ary efa fanaon’izy roa ihany ny miady sy ny mifamono an-trano ary izao niafara amin’ny famoizana ain’olona izao.

Nametraka fitoriana an’ilay lehilahy nahavanon-doza ny fianakavian’ny maty. Taorian’ny famotorana natao an’ilay rangahy dia nampidirina vonjimaika ao amin’ny fonjan’ny Ambilobe mandra-pahatonga ny fitsarana azy.

Laurena Nany