Manao ny asany andavanandro amin’ny fanakatonana ireo toeram-pisotroana mbola misokatra mihoatra ny amin’ny 10 ora alina ny Polisy ny zoma 17 jolay tamin’ny 10 ora alina raha toa ka nisy zandary manam-boninahitra avy ao amin’ny FIGN avy any Antananarivo mbola nisotro tamin’ny toeram-pivarotana iray teny amoron-dranomasina ao Toamasina. Ity farany izay nanohitra mafy ny amin’ny fanakatonana io toerana io fa hoe mbola misotro izy ary tsy refesin’ny polisy izany. Tsy nanaiky izany fanoherana izany anefa ny Polisy fa izay no lalàna misy navoakan’ny kaominina efa hatramin’izay.

Raikitra ny fifamaliana tamin’ny roa tonta. Nanao tatitra tamin’ny alalan’ny antso an-tariby tamin’ny lehibeny, ny kaomisera lefitra, ireo polisy. Etsy ankilany dia niantso ny namany koa ireo zandary FIGN ka zandary iray fiara sy manao saron-tava efa vonona ny hitifitra no nigadona teo amin’io toerana io ary nandrahona ireo polisy.

Nihorohoro ny manodidina

Naharitra adim-pamantaranandro iray sy sasany ny fiziriziriana teo amin’ny roa tonta. Ny fahatongavan’ny kaompanian’ny zandarimariam-pirenena avy tao amin’ny toby Gallien no nampilamina ny raharaha. Nandritra izany dia nitebiteby sy nihorohoro  tanteraka ireo olona teny amoron-dranomasina. Na ahoana na ahoana mantsy dia handratra sy hahafaty olona tsotra ny mety ho fifampitifirana teo amin’ny roa tonta raha raikitra teo.

“Aza eritreretina ny iantsoanay “renfort” fa ho zava-doza ny eto. Tsy asan’ny FIGN ny fandaminana anatin’ny renivohitra satria tsy misy ady na korontana akory eto”, hoy ny kaomisera lefitra, tsy rototra.

Tsotra ihany koa ny  navalin’ireo zandary dia ny hanakatonana ny trano fivarotana toaka, izay anjaran’ny polisy ao Morafeno ka anisan’ny mampitaraina ny olona. Ity farany izay mahazo tombony sy misokatra mandra-maraina araka ny fantatra.

Laurena Nany