Nizotra an-tsakany sy andavany ny fanadinam-panjakana voalohany manerana ny Nosy, dia ny fanadinana Cepe izany. Samy nanaja ireo mpanala fanadinana avokoa ny ankamaroan’ireo kandida nilatsaka ho fidiana amin’ny kaominaly. Voahaja tanteraka ny fahanginana nandritra tamin’ny andron’ny 21 jolay. Samy nanapa-kevitra ny amin’ny fampitsaharana ireo hetsika fanentanana amin’ny fanamafisam-peo entina amin’ny fiara mihodidina ny tanàna na “tam-tam” ny kandida rehetra.

Vao maraina dia efa samy nitanjozotra nihazo ireo foibem-panadinana ny ray aman-dreny amin’ny fanohanana ireo ankizy hanala io fanadinana io. Tamin’ny fanambarana nataon’ireo ray aman-dreny dia mila tambitamby ny ankizy amin’izao fiatrehana dingana lehibe eo amin’ny fangalana ny diplaomam-panjakana voalohany izao, izay mahatonga azy ireo hanatitra ny zanany.

Etsy ankilan’izay kosa dia matoky ireo mpianatra tanteraka ireo mpanabe. Nandritra ny folo volana nampianarana ireo ankizy mantsy dia efa natao avokoa ny fomba rehetra mba hampitana tsara ny lesona tany amin’ny ankizy.

Laurena Nany